Psalmet 8
1 Për dirigjuesin. Mbi gitit. Psalm i Davidit. O Jahveh, Zoti ynë, sa i madhërishëm emri yt në gjithë tokën! Ti që e ke vënë madhështinë tënde mbi qiejt.
2 Prej gojës së të vegjëlve dhe foshnjave ke caktuar forcë, për shkak të kundërshtarëve të tu, që të bësh të reshtin armiku dhe hakmarrësi.
3 Kur shoh qiejt e tu, veprat e gishtave të tu, hënën dhe yjet që ti ke vendosur,
4 çfarë është njeriu që ta kujtosh dhe biri i njeriut që ta vizitosh?
5 Megjithatë, e bëre paksa më poshtë se qeniet hyjnore dhe me lavdi e nder e kurorëzove.
6 E bën të sundojë mbi veprat e duarve të tua, gjithçka e ke vënë nën këmbët e tij:
7 dhen dhe gjedhë, të gjitha ato; dhe madje kafshët e fushës,
8 zogjtë e qiejve dhe peshqit e detit, çfarëdo që shtigjet e deteve përshkon.
9 O Jahveh, Zoti ynë, sa i madhërishëm emri yt në gjithë tokën!
Të gjithë librat
