- Faqja e parë
- Rreth Përkthimit
- Pyetje të shpeshta
- Bli Online
- Regjistrohu
- Identifikohu
Lexo Lexo Biblën Online
Bibla PRO – Përkthimi i Ri nga Origjinali
Bibla PRO është i vetmi përkthim i Besëlidhjes së Re në botë në të cilin i njëjti grup ekspertësh (përkthyes, redaktorë, korrektorë) ka sjellë përkthimin e tri teksteve në gjuhën origjinale greke me të njëjtën filozofi përkthimi.
Përkthim fjalë për fjalë nga gjuhët origjinale
Projekti Bibla PRO - Përkthimi i Ri nga Origjinali - ashtu siç edhe emërtohet, është një përkthim i ri i Shkrimit të Shenjtë në gjuhën shqipe, i bazuar plotësisht në gjuhët origjinale të teksteve biblike: hebraisht, aramaisht dhe greqisht.
Për përkthimin e Besëlidhjes së Vjetër (BV) është përdorur si tekst bazë ai i OSHB (Open Scripture Hebrew Bible), i cili paraqet të ashtuquajturin Teksti Mazoretik (TM) sipas Kodikut të Leningradit (Codex Leningradensis). Ky i fundit përbën bazën e botimit standard Biblia Hebraica Stuttgartensia.
Besëlidhja e Re
Për përkthimin e Besëlidhjes së Re (BR) ofrohen tri përkthime të tri teksteve në gjuhën origjinale greke, që përdoren sot për përkthimin e BR.
Përkthimi nga teksti kritik UGNT
Përkthimi i parë ka si tekst bazë atë të UGNT-së (Unfolding Greek New Testament) i cili, në thelb, ndjek të njëjtin tekst që gjendet në botimet standarde greke: The Greek New Testament, të United Bible Societies dhe Nestle-Aland, Novum Testamentum Graece.
Por UGNT përmban me kllapa katrore këto pjesë:
- Mat. 16:3; 17:21; 18:11; 23:14;
- Mar. 7:16; 9:44; 9:46; 11:26; 15:28; 16:9-20;
- Luk. 17:36; 22:43-44; 23:17;
- Gjon. 5:4; 7:53; 8:1-11;
- Vep. 8:37; 15:34; 19:41; 24:7; 28:29;
- Rom. 16:24;
Kur UGNT-ja ka ndryshime të qenësishme nga botimet standarde të mësipërme apo nga i ashtuquajturi Textus Receptus (TR), ato janë pasqyruar në çdo rast me shënime përkatëse.
Përkthimi nga teksti i mirënjohur si Textus Receptus
Përkthimi i dytë ka si tekst bazë Textus Receptus (TR), sipas botimit të F. H. A. Scrivener më 1894 dhe 1902, i cili është ribotim i disa botimeve më të hershme të tekstit grek të njohur me këtë emër, më specifikisht të tekstit të botuar nga Robert Estienne (Stephanus) më 1550.
Mbi këtë tekst është bërë përkthimi i Besëlidhjes së Re të King James Bible më 1611.
Përkthimi në shqip i TR, ndryshe nga ai i UGNT-së, nuk ofron shënime tekstuale për ndryshimet mes tij dhe UGNT-së apo botimeve të UBS-së dhe Nestle-Aland.
Përkthimi nga Teksti Ortodoks Bizantin Byz 04
Përkthimi i tretë ka si tekst bazë Patriarchal Greek Orthodox Byzantine Tekst, të botuar më 1904 (Byz 04), i cili është teksti zyrtar i miratuar nga Patriarkana e Stambollit (Kostandinopojës) për përdorim në kishat ortodokse nëpër botë.
Lidhja ndërmjet tri përkthimeve
Të tria përkthimet e ofruara janë në thelb të njëjta qoftë për sa i përket filozofisë së përkthimit (“përkthim i ekuivalencës formale” apo “përkthim fjalë për fjalë”) e qoftë për sa i përket aspekteve morfo-sintaksore dhe semantike. Ato ndryshojnë vetëm në ato raste kur vetë tekstet mbi të cilat janë bërë përkthimet kanë ndryshime mes tyre.
Qëllimi dhe karakteristikat
Qëllimi kryesor i Biblës PRO është t’i ofrojë komunitetit të krishterë shqiptar në përgjithësi, si dhe studiuesve të Biblës, predikuesve, gjuhëtarëve dhe çdo individi që dëshiron një lexim studimor, një përkthim të këtyre tri teksteve të BR, i cili synon të ketë tri karakteristika:
- Sa më i saktë dhe besnik ndaj gjuhëve origjinale në aspektin semantik dhe stilistikor.
- Sa më i qartë dhe i rrjedhshëm në lexim, në përputhje me standardin e shqipes së sotme.
- I besueshëm në paraqitjen e përmbajtjes teologjike dhe të informacionit historiko-kulturor.
Formatet e botimit
Për të realizuar këtë qëllim, Përkthimi i Ri nga Origjinali (PRO) i të tria teksteve do të ofrohet në format të printuar dhe elektronik (online) në dy variante: interlinear dhe standard.
Përkushtimi
Puna për këtë përkthim është një ndërmarrje njerëzore e rëndësishme, që kërkon kohë dhe përkushtim fizik e shpirtëror.
Ky nuk është një projekt që do të realizohet në një kohë të shkurtër dhe të gjithë ata që do të përfshihen shumë apo pak në këtë projekt, duke filluar që nga mbështetja edhe më e vogël financiare, e deri te përkthimi i Fjalës së Zotit, e bëjnë sepse “dashuria e Tij i shtrëngon” (2 Kor. 5:14) dhe, ashtu si ata që e ndërtuan Bazilikën e Vrinës (Butrint) dhe ia përkushtuan Zotit veten dhe mundin e tyre, edhe ne mund të themi që emrat e atyre që e përmbushën këtë shërbesë, i di Perëndia Vetë.
Soli Deo Gloria!
6.14 MB