Letra I e Gjonit 1
1 Çfarë ishte nga fillimi, çfarë kemi dëgjuar, çfarë kemi parë me sytë tanë, çfarë vëzhguam dhe duart tona prekën rreth Fjalës së jetës
2 (dhe jeta u shfaq, dhe ne e kemi parë, dhe dëshmojmë, dhe ju njoftojmë jetën e përjetshme, e cila ishte me Atin dhe na u shfaq neve),
3 çfarë kemi parë dhe kemi dëgjuar, jua njoftojmë juve, me qëllim që edhe ju të keni përbashkësi me ne (dhe vërtet përbashkësia jonë është me Atin dhe me Birin e tij, Jezu Krishtin).
4 Dhe këto jua shkruajmë me qëllim që gëzimi ynë të jetë i plotësuar.
5 Dhe ky është lajmërimi që e kemi dëgjuar nga ai dhe po jua lajmërojmë: Perëndia është dritë dhe në të nuk ka errësirë aspak.
6 Po të themi se kemi përbashkësi me të dhe të ecim në errësirë, gënjejmë dhe nuk po ushtrojmë të vërtetën.
7 Por po të ecim në dritë, ashtu si ai është në dritë, kemi përbashkësi me njëri-tjetrin dhe gjaku i Jezu Krishtit, Birit të tij, na pastron nga çdo mëkat.
8 Po të themi se nuk kemi mëkat, mashtrojmë vetveten dhe e vërteta nuk është në ne.
9 Po t'i rrëfejmë mëkatet tona, ai është besnik dhe i drejtë, që të na i falë mëkatet dhe të na pastrojë nga çdo padrejtësi.
10 Po të themi se nuk kemi mëkatuar, e bëjmë atë gënjeshtar dhe fjala e tij nuk është në ne.
Të gjithë librat
