Letra drejtuar Efesianëve 2:1
Efesianëve 2:1
Pjesorja o[nta~ [ontas] (“duke qenë”) me funksion lejor (“megjithëse ishit”) fillon një fjali të varur lejore, e cila shkon deri në fund të v. 3, por që mbetet e paplotësuar, për shkak se nuk vijon me fjalinë drejtuese. Pra, lexuesi mbetet në pritje të fjalisë drejtuese deri në fund të v. 3, por pastaj, në mënyrë të papritur fjalia ndërpritet. Pali e rifillon arsyetimin e tij me v. 4 dhe rimerr fjalinë lejore në v. 5a, duke vazhduar nga v. 5b e vijim me fjalinë drejtuese. Me fjalë të tjera, fjalia lejore “Dhe ju, megjithëse ishit të vdekur në shkeljet dhe mëkatet tuaja” duhej të vijonte me fjalinë drejtuese në v. 5b “ju bëri të gjallë bashkë me Krishtin”, por Pali shtie në mes vargjet 2 dhe 3 disa fjali në të cilat përshkruan gjendjen e tyre përpara besimit në Krishtin.
Cila mund të ishte arsyeja pse Pali shkroi në këtë mënyrë? Komentuesit përgjithësisht sugjerojnë se kjo ka qenë e qëllimshme nga ana e Palit. Arsyeja kryesore është se Pali nuk donte të kalonte menjëherë nga gjendja e tyre (dhe e gjithë njerëzimit) përpara besimit (v. 1) te vepra e Perëndisë në Krishtin (v. 5b-10), pa përshkruar mënyrën se si shprehej kjo gjendje dhe implikimet e saj në raport me Perëndinë (vgj. 2-3). Por meqenëse ky përshkrim e largoi shumë nga fillimi i fjalisë lejore, e rimerr arsyetimin në v. 4 duke përsëritur fjalinë lejore në v. 5a. Arsyeja e dytë është se “pjesorja e mbetur varur i lë lexuesit pezull ndërsa ata presin për zgjidhje (në v. 4) të dilemës së tyre frymërore” (NET Bible, shën.).
Përballë këtij teksti, përkthyesi duhet të përzgjedhë nëse do ta shmangë këtë mënyrë të shprehuri të Palit (bashkë me të gjitha implikimet e saj të paraqitura më sipër), apo do ta pasqyrojë ashtu siç është. Shumica e përkthimeve në gjuhët e tjera dhe versionet në shqip e shmangin, duke riformuluar tekstin në përkthim përmes variantesh përkthimore të ndryshme. Në shqip kjo është bërë përgjithësisht duke dhënë pjesoren o[nta~ [ontas] me folje në dëftore dhe pa lidhëz lejore, por në ndonjë rast edhe duke shtuar në v. 1 fjalinë drejtuese të v. 5a (kështu bëjnë Kristoforidhi dhe ABS).
Versioni Bibla PRO, sikurse në anglisht NET dhe LEB, ka përzgjedhur ta pasqyrojë tekstin ashtu siç është, jo vetëm për të shprehur besnikërisht tekstin biblik siç është transmetuar nga Fryma e Shenjtë, por edhe për të pasqyruar arsyet e mundshme që kishte Pali kur shkroi kështu, me qëllim që edhe lexuesi i sotëm të ketë të njëjtën ndjesi dhe pritshmëri ashtu si lexuesit e parë të letrës.