Efesianëve 5:18
Çështja këtu ka të bëjë me kuptimin e parafjalës ejn [en] në ndërtimin ejn Pneuvmati [en Pneumati], që mund të përkthehet “në Frymë”, “me Frymë”, “me anë të Frymës”. Për shkak të paralelizmit me emrin “verë”, që tregon lëndë dhe, si rrjedhim, dhanorja e emrit oi\no~ [oinos] përkthehet “me verë”, shumë e interpretojnë emrin në dhanore Pneuvmati [Pneumati] si dhanore përmbajtjeje (Dative of Content) dhe parafjalën ejn [en] e përkthejnë si “me”, pra “me Frymën”. Megjithatë, ky interpretim është vënë në dyshim për dy arsye: së pari, Fryma nuk është lëndë, pavarësisht se mund të flitet për praninë e Frymës së Shenjtë te besimtari dhe “mbushje me Frymën e Shenjtë” (p.sh. Vep. 2:4; 4:8, 31 etj. por nuk është i njëjti ndërtim në greqisht). Siç e ka vënë në dukje F. F. Bruce, The Epistles to the Colossians, to Philemon, and to the Ephesians, The New International Commentary on the New Testament, (Grand Rapids, MI: Wm. B. Eerdmans Publishing Co., 1984), f. 380: “Antiteza mes verës dhe Frymës nuk do të thotë se Fryma është një farë lëngu me të cilin mund te mbushesh, po aq sa bashkëvendosja e pagëzimit në ujë me pagëzimin në Frymë nuk do të thotë se Fryma është një farë lëngu në të cilin mund të zhytesh ”.
Arsyeja e dytë është se për të treguar përmbajtje, Pali do të kishte përdorur gjinore të përmbajtjes (Genitive of Content). Kjo është vënë në dukje, së pari, nga J. Armitage Robinson, St. Paul's Epistle to the Ephesians: A Revised Text and Translation With Exposition and Notes. Second Edition. (Bellingham, WA: Logos Research Systems, Inc., 2009), f. 204: “Përkthimi i përhapur ‘Mbushu me Frymën’ na sugjeron, së pari, se urdhëresa ka kuptimin ‘Ji përplot me Frymën e Shenjtë’. Megjithatë, një urdhëresë e këtillë nuk gjendet tjetërkund: nëse ky do të ishte kuptimi që Apostulli ka pas ndërmend, mund të jemi pothuajse të sigurtë se ai do të kishte përdorur gjinoren.
Duhet pranuar se, pavarësisht që përdorimi i gjinores me një folje mbushjeje është përdorimi normal, ka 3 raste në BR ku përdoret emri në dhanore pa parafjalë (Rom. 1:29; 2 Kor. 7:4; Luk. 2:40), megjithatë nuk ka asnjë shembull në greqishten biblike ku ejn [en] + dhanore të tregojë përmbajtje. Kjo është vënë në dukje më herët nga T. K. Abbott, A Critical and Exegetical Commentary on the Epistles to the Ephesians and to the Colossians, International Critical Commentary, (New York: C. Scribner's sons, 1909), f. 161: “Por përdorimi i ejn me plhrovw për të shprehur përmbajtjen me të cilën dicka është e mbushur, do të ishte krejt i pashembullt”. Si rrjedhim, siç vëren Daniel B. Wallace, Greek Grammar Beyond the Basics - Exegetical Syntax of the New Testament, (Zondervan Publishing House and Galaxie Software, 1999, 2002), f. 171: “Rrjedhimisht, interpretimi popullor ‘mbushuni me Frymën’ i plhrou`sqe ejn pneuvmati te Efes. 5:18, në kuptimin që Fryma është përmbajtja me të cilin njeriu mbushet, ka shumë gjasa të jetë I pasaktë”. Por parafjala ejn [en] mund të tregojë sferë dhe mjet. Sipas J. Armitage Robinson, vep. cit., f. 204: “Vijimësia e mendimit duket sikur është: Mos u deh me verë, por gjej përmbushjen tënde nëpërmjet një mjeti tjetër, ose në një sferë më të epërme”. Nëse parafjala merret si sferë apo fushë, çfarë Pali po thotë është që mbushja duhet të jetë në sferën e veprimtarisë së Frymës së Shenjtë, përkundër të qenët të dehur me verë, “në të cilën [sferë] ka shthurje”. Pra, përkundër të qenët në sferën e ndikimit nga vera, të krishterët duhet të jenë të mbushur në sferën e veprimtarisë dhe ndikimit të Frymës së Shenjtë. Nëse parafjala merret si mjet, çfarë Pali po thotë është që Fryma e Shenjtë është mjeti (means) apo vepruesi (agent), me anë të të cilit bëhet mbushja. Pra, përkundër të qenët të dehur “me verë”, të krishterët duhet të mbushen “me anë të Frymës”. Sipas Peter T. O'Brien, The Letter to the Ephesians, The Pillar New Testament commentary, (Grand Rapids, Mich.: W.B. Eerdmans Publishing Co., 1999), f. 391: “… të kuptuarit e en pneumati si dhanore instumentale/mjeti, e cila thekson mjetin apo mënyrën me anë të së cilës mbushen besimtarët (p.sh prej Frymës së Shenjtë), ka përparësi nga ana sintaksore dhe ka më tepër kuptim”.
Mbi bazën e këtij interpretimi, përmbajtja e mbushjes nuk është përmendur specifikisht, por përdorimi edhe në vende të tjera në këtë letër i “mbushjes”, mund të japë të dhëna në këtë drejtim. Kështu, sipas Daniel B. Wallace (cituar edhe te NET Bible), vep. cit., f. 375: “Kuptimi i këtij teksti mund të përftohet plotësisht vetëm nën dritën e kuptimi i plhrovw tek Efesianëve. Termi gjendet gjthmonë i përdorur në lidhje me një prej pjesëtarëve të Trinisë. Tre janë konsideratat thelbësore: (1) Te Efes. 3:19 lutja “kyce” e cila paraprin gjysmën e dytë të letrës, bën një kërkesë që besimtarët ‘të mbushen me gjithë plotësinë e Perëndisë’ (plhrwqh`te eij~ pa`n to; plhvrwma tou` qeou`). Andaj, përmbajtja ekplicite e plhrovw është plotësia/mbushullia e Perëndisë (me shumë mundësi një reference në lidhje me atributet e tij morale). (2) Te 4:10, Krishti cilësohet të jetë agjenti i mbushjes (me vargun 11 që shton detajet e të dhënit të dhuratave frymore të tij). (3) Autori më pas i sjell argumentat e veta në një kreshendo: Besimtarët duhet të mbushen nga Krishti, nëpërmjet Frymës, me përmbajtjen e plotësisë së Perëndisë”. Në këtë drejtim shkon edhe Peter T. O’Brien, vep. cit., f. 392. Nisur nga sa më sipër, por duke konsideruar edhe raste të tjera kur ndërtimi ejn [en] + Fryma mund të jetë përdorur për të treguar sferë apo mjet (shih në këtë letër 2:22; 3:5; 4:30; 6:18; por edhe 1 Kor. 12:3, 13; 14:16; Rom. 15:16), është parë e arsyeshme që në përkthim të jepet kuptimi bazë “në Frymë” dhe të pasqyrohen me shënimin përkatës mundësitë e tjera të përkthimit.